Тыва чоннуң культурлуг болгаш сагыш-сеткил өнчүзүнүң чарылбас кезээ, регионда күрүне дылы болур тыва дылды кадагалап, деткип база нептередир сорулга-биле, республика Баштыңы 2016 чылдың январь 18-те Чарлыы-биле Тыва дыл хүнүн тургускан.

Тыва Республиканың Өвүр район шүүгүзүнүң ажылдакчылары Тыва дыл хүнүнге тураскааткан диктантыны бижээннер. Диктантыны Солчур ортумак школазынын директору, тыва дыл болгаш чогаал башкызы Донгак Арыяа Өлчейовна киржикчилериниң бижик-билииниң, күрүне дылының дугайында оларның билиглериниң деңнелин хынап, төрээн дылга чугаалажырын база өөренирин кижизидеринге идигни бээр сорулга-биле бижиткен.

Диктантыны бижиир мурнунда шүүгүнүң ажылы-биле тыва дыл кайы хире херек, ужурлуун, оон-биле холбаалыг ажылдап турарын, чижек кылдыр Тывадан дашкаар кем-херек үүлгедип алган таварылгаларда тыва дылдан орус дылче очулдурукчуларның дузазы херек деп чүүлдү сагындырган. 

Диктантының түңнелдери-биле шупту ажылдакчылар эки бижээнин, ол ышкаш тергиин эки бижээн судьянын дузалакчызы Достай-оол А.В. демдеглээн. База богун чараш байырлалдың дугайында солун хемчегни делегейчеткизинге тыва дылга чырыдарын сумелээш, шупту ажылдакчыларга байырны чедирип Вадим Чыкайның шүлүү-биле дооскан.

Ө-деп үжүк өнчүвүс бооп артпайн барза,

Өөвүске өпей ыры чаңгыланмас.

Өзүп орар чаптанчыг чаш салгалывыс

Өткүт үн чок өртемчейни чарашсынмас.

Ң-деп үжүк ыңаа дигеш ыңайлаза,

Ң-ның соонда ындыг кежик биске келбес.

Ыңаажыктар, Ыңаалайлар дээн ышкаш,

Ыңгыржактыг төрүттүнер эрлер турбас.

Ү-деп үжүк үжүглелден үнер болза,

Үндезинниг дылывыс-даа номчуттунмас.

Үе-шагның казыргызын шыдап эрткен

Үлегерлиг чонувус-даа таныттынмас.

Тынывыс дег тыва дылывыс кажанда-даа өжүп, хөмүрээрип, хөлге-хемге дүжүп, артка-сынга астыгып читпес-ле болзунам! Курай, курай! Тыва дылывыстың хүнү-биле!        

Өвүр район шүүгүзүнүң администратору Алдынай Хирбээ